ورقة غيّرت حياتي للأبد

Description

Script Vidéo

كيف ورقة وحدة قلبت حياتي كلها بلا منفهم
انا نوفل والقصة اللي غادي نعاود ليكم اليوم هي قصة حقيقية وقعات ليا و معمرها غادي نساها ، سمعوني مزيان

أنا ماشي من الناس اللي كيتأثرو بزاف… خدام، حياتي عادية، ساكن بوحدي فستوديو صغير فحي شعبي.
ونهار اللي وقع فيه هاد الشي، ما كان فيه حتى حاجة خارجة على العادة.

نهار ثلاثاء، ما عمّري نسيتو.
رجعت من الخدمة مع الستة ونص، دخلت للدار،
شعلت الضو، بدلت حوايجي، وكلشي عادي.وجدت الماكلة ديالي ولكن نسيت مجبتش معايا الخبز ،

لبست فرجلي وانا غادي نخرج نجيب خبز من الحانوت،
لقيت ورقة صغيرة مدسوسة تحت الباب.
فيها جملة وحدة:

“ما تحاولش تفهم، غير خرج.”

وقفت كنقراها،
قلت يمكن شي حد كيتفلى، ولا غلط فالعنوان.
رميتها، وخرجت.

مورا العشاء، وأنا كنقلب فالتليفون،
سمعت دقة خفيفة فالباب…
مشيت نشوف شكون لقيت الجار ديالي قالي و هو كيضحك واش مسمعتيش الدقان من صباح واحد الراجل كيدق عليك ومشا فحالو

سديت الباب و مشيت لبيتي بقيت كنخمم…
شنو كاين؟
ياك ما هو لي كيحاول يضحك معايا
صافي نعست حيتاش عندي خدمة فالصباح
فليل، مع الربعة صباح،
سمعت بحال شي رملة كتضرب فالشرجم…
ماشي قوية، ولكن كتعاود.

فقت، ولكن ما تحركتش.
بقيت كنسمع الصوت كيتعاود…
بحال شي حد كيرمي رمل ولا شي حاجة صغيرة

فالصباح، قبل ما نمشي للخدمة،
لقيت ورقة أخرى، بنفس الخط،
مكتوب فيها:

“ما بغيتكش تبقى، خرج.”
صافي حسيت بلي هادشي بدا كيطول
جمعت راسي، مشيت نبات عند خالي اللي ساكن بعيد.
داك الليلة دازت عادية.

الغد، رجعت للدار،
لقيت الباب محلول شوية …
دخلت و انا مخلوع كنسول واش كاين شي واحد فالدار
شوية كنشوف وسط الطابلة، كانت ورقة ثالثة:
مكتوب فيها بالدم
“ماشي أنت اللي خاصك تشوفني… ولكن درتيها.”

ما بقاتش عندي القدرة نبقى.
خرجت، ومشيت ديركت عند البوليس.
ما لقاو والو، الكاميرات ديال الزنقة ما كانتش خدامة،
وحتى الجيران ما شافو حتى حاجة

من داك النهار،
كل صباح، كنفيق كنلقا ورقة جديدة تحت الباب،
بيضاء، بلا حتى كلمة.

واللي غادي يزيد يحيرك…

هو أنني تحولت من ديك المدينة وليت ساكن مع خالتي
دابا…

الى فايت وقعلك فحال القصة ديالي كتبولي فالكومونتير و قولولي شنو وقع من بعد …